2Pe 1 | GbrGAW | STEP | Wasika nkwo gmi n Siman Bitrus aba, Yesu Kristi fyenu n tnu-tnuyi. Kwoi lo aza ba vinya n ɓa ku gaiciya ga latu nya bwa eyi-nya pya nyi, dna n ɓefyece eyi Shekwoyi, n eyi Gniyi Yesu Kristi nya yi.

2 Peter 1

1 Wasika nkwo gmi n Siman Bitrus aba, Yesu Kristi fyenu n tnu-tnuyi. Kwoi lo aza ba vinya n ɓa ku gaiciya ga latu nya bwa eyi-nya pya nyi, dna n ɓefyece eyi Shekwoyi, n eyi Gniyi Yesu Kristi nya yi.

Fye Kpe Wo Ye Ndudu

2 Fye ye Shekwoyi alheri lo woye ga fye lo abye? To, fye tumwi fya kpe woye lo abye-abye. 3 Ntuge n fye kpewoye labye, wo ɓa ga fye, dna nwo iko yakwo, anya vinya n fye ɓa pmai, ntu na sase manai ɓo: har wo zhin wa gayi owo latu n ɓemanai yi. 4 Dna wo iko yakwo, woku anyabwaje gayi n anabarka manai yi nwa zhin yi alkawali nyi. Wato woku alkawali zhin ge woɓa gniyiya n shakpe, n cegyeyi nkwo sheyigun ɓa nyi, wa pmi wa gayi owo ɓefyece.

5 Ama kafin fye gwo anabarka ye, fye n na pmailo n nyai n kwo du gaiciya ga, tilas fya zhin atna fya ze aza manayi; har ma kwo to zotu lo ɓon, ntuge fye na pmailo fya kpe Shekwoyi ye lo abye-abye, fya kpe enya ye n wo cei pma fya zhin. 6 Nnavun fye tumwi fya ga ofye ɓopwawo nnabai fya ze amizhiyi nna Shekwoyi zokwo viyi yi, fyei fa Shekwoyi wa wu fye zokwo dna na gmada. 7 Deye nu ɓa zhin fya wo azaje agmada, fya yeɓa ce har n shince n ʼkni yj. 8 Nfya gyabye lonu, fye ɓa gna kala bwa-bwa dna zafun har fya ze aza apmada n yi Dagayi Yesu Kristi aba. 9 Ama oza nwo to vi aɓeye n gaiciya ga avun, wo zhin wyebuai nu, kwo wo ta gye wyeba cewon, woi la zamwi ge wa bwa kala wa sase manai ga Dagayi.

10 Ntucenu, oma zaje, fye zhin tnu-tnu fya fyehin yi, fya wu ge fye filo n naza n Shekwoyi wa yi, woi kni. Nlonu fye ta ce bwonyin, kwo fya miyan. 11 Shekwoyi ɓa gu fye eshe abwokun-mi ya bmam, ntuge fya lo owo ebemi nyalo-nyalo nya eyi Dagayi nya, n ʼyi gniyi yi, Yesu Kristi.

12 Miye ma ce fye ɓepa cici n na ɓeye tukwo, kwo shikwo nyi fye kpeɓa yelo, fyei viɓa lo cewo. 13 – 14 Ama Dagayi Yesu Kristi ku wumi ge ema nyipyei n na nyiye, ɓaku ga nu, miɓa fi esa fyewyi sa n mi ye wye-wyeyi lo kpa, miɓa tnu fye na ɓepayei cici, 15 nna wyetui ge ɓa lo fye mi dei-dei n nabai fye-e paɓa ɓo mi yi la-laka n nanyi.

16 Ntuge yi to ɓei zhin yi ta fye aza cece osi nun, esa yi ɓei wufye iko eyi Dagayi Yesu Kristi nya nwo jeze-ɓei nyin. Oma wye ku gye owo mwamwa n wo latu yi. 17 – 18 Mʼɓei tu n epe Gyi-gyi-yi sanu wo ɓei bmiyana n mwa n Shekwoyi owo Dada ɓei gawo nyi. Mʼɓei ku wo, begye yakwo, ikoda, latu nya, kwoi gmi n ʼshe kwoi ci ge, “omi Nugun ye-yei nu nyi. Owo ɓo dami n mwa.”

19 Ntu cenu yiku gye yi-i ku kpe ge oɓo na anabi ɓei danyi kwo laze gaiciya. Kwo ɓa bma fye zhin, fya ku bugba ga enya ɓa ɓei kanyi, ntuge she buzangna zhin kwa bmiyana fi n na wyegma ba nyi, oɓa ɓeda bmayi zhin yi kpe aɓo ye n ɓa ɓei ɓa dna yi wyegma n dnaɓo. Ama esa nfya dna gaiciya manai a anabi nya wye, buzangna bmiya fi n fya bugba n sayi Kristi-Kpasu Labmi nya-wa bmiya fi fye n fya bugba mi. 20 – 21 Ama fye ku kpe ge a anabi ɓeda doho-dohoi to lo n kwo kadna n litafi n ɓa ɓei zhin ko nubo nɓahin tukwo yim. Zafun Gyi-gyi-yi nu ɓei dna n na ɓefyecei-ye mi, woi ga ɓa nabari gaiciya nya n kwo gmi n Shekwoyi aba.